Dussehra 2025: दसऱ्यादिवशी वहीपूजन करण्याचं काय आहे विशेष महत्त्व; या गोष्टींमध्ये चुकू नका

वहीपूजन (सरस्वती पूजन) करण्याची पद्धत आणि महत्त्व - वहीपूजन, शस्त्रपूजा (आयुध पूजा) आणि सरस्वती पूजन विजय मुहूर्तावर किंवा अपराह्न पूजा वेळेत करणे सर्वोत्तम मानले जाते. देवघरासमोर किंवा एका स्वच्छ पाटावर लाल किंवा पिवळे वस्त्र अंथरावे. वही (नवीन किंवा जी वापरत आहात), पुस्तके, पेन/पेन्सिल, व्यवसाय संबंधित कागदपत्रे/खातेवह्या, लॅपटॉप किंवा इतर ज्ञानसाधना. हळद, कुंकू, अक्षता, गुलाल/अबीर, झेंडूची फुले, तुळशीचे पान, उदबत्ती, दिवा, नैवेद्यासाठी गोड पदार्थ (उदा. गूळ-दाणे किंवा दूधसाखर).

वहीपूजन विधी - योग्य मुहूर्तावर पाटावर आसन ग्रहण करून सरस्वती देवी आणि गणपतीचे स्मरण करून पूजा सुरू करावी. ज्या वहीचे किंवा पुस्तकाचे पूजन करायचे आहे, ती पाटावर व्यवस्थित ठेवावी. सर्वप्रथम पुस्तकांना आणि वह्यांना हळद-कुंकू लावावे. अक्षता आणि झेंडूची ताजी फुले वह्यांवर, पुस्तकांवर आणि पूजेच्या साहित्यावर वाहावीत. "ॐ श्री गणेशाय नमः" आणि "ॐ श्री सरस्वत्यै नमः" या मंत्राचा जप करावा. पेन किंवा लेखणीलाही हळद-कुंकू लावून तिची पूजा करावी. ही लेखणी आपल्या ज्ञानाची आणि कर्माची साधना आहे. तयार केलेला नैवेद्य अर्पण करावा. तुपाचा दिवा लावून सरस्वती देवीची आरती करावी. वहीपूजन करताना सरस्वती देवीकडे चांगली बुद्धी, विद्या आणि ज्ञान तसेच व्यवसायात यश आणि समृद्धी मिळो यासाठी प्रार्थना करावी.

वहीपूजनाचे महत्त्व - विजयादशमीच्या दिवशी वहीपूजन केल्याने सरस्वती देवीची कृपा कायम राहते. याचा अर्थ आपण आपल्या ज्ञानाच्या साधनांचा आदर करत आहोत. दसरा हा साडेतीन मुहूर्तांपैकी एक असल्याने या दिवशी वहीपूजन करून नवीन पुस्तके किंवा नवीन खातेवही सुरू करणे नवीन कामाच्या यशस्वी आरंभासाठी शुभ मानले जाते. या दिवशी पूजा केल्याने वर्षभर कामात किंवा शिक्षणात यश, प्रगती आणि सकारात्मक ऊर्जा मिळते, अशी श्रद्धा आहे.