लग्नमंडपातच ED चा छापा! नवरदेव सात फेऱ्या घेण्यापूर्वी फरार, 15,000 कोटींचा घोटाळा केल्याचा संशय

ही थरारक घटना जयपूरमधील अलिशान फेअरमॉन्ट हॉटेलमध्ये घडली. नवरदेव सौरभ आहुजा हा सुमारे 15,000 कोटी रुपयांच्या महादेव बेटिंग ॲप घोटाळ्यातील एक महत्त्वाचा पाहिजे असलेला आरोपी आहे. ईडी अधिकाऱ्यांना नेमकी खबर मिळाली होती की, सौरभ आहुजा आपल्या कुटुंबासोबत फेअरमॉन्ट हॉटेलमध्ये शांतपणे लग्न करत आहे. त्याची खबर मिळताच, ईडीचे पथक त्याला अटक करण्यासाठी विवाह स्थळी पोहोचले. मात्र, धाड पडणार असल्याची पूर्वसूचना मिळाल्याने सौरभ आहुजा 'सप्तपदी' पूर्ण होण्यापूर्वीच, वधूच्या बाजूचे नातेवाईक आणि पाहुणे अवाक होऊन पाहत असताना, मंडपातून अचानक गायब झाला.

प्रत्यक्षदर्शींनी दिलेल्या माहितीनुसार, सौरभ आहुजाने तातडीचा फोन आल्याचे सांगून अचानक लग्नाच्या स्टेजवरून काढता पाय घेतला आणि कुणाला काही कळायच्या आतच तो दिसेनासा झाला. ईडीचे अधिकारी त्याला अटक करण्यासाठी घटनास्थळी पोहोचले, तोपर्यंत तो पसार झाला होता. सौरभ आहुजावर महादेव ऑनलाइन बेटिंग ॲपशी संबंधित कोट्यवधी रुपयांच्या बेकायदेशीर व्यवहारांचे व्यवस्थापन केल्याचा आरोप आहे. मनी लॉन्ड्रिंग प्रकरणात तो काही काळापासून ईडीच्या रडारवर होता. त्याच्या अटकेसाठी रायपूरमधून एक विशेष पथक जयपूरला पाठवण्यात आले होते.