Shilpa Shetty-Raj Kundra: शिल्पा शेट्टी-राज कुंद्राला हायकोर्टाचा आणखी एक मोठा झटका, नेमकं काय घडलं?

शिल्पा-राज यांनी 2 ते 5 ऑक्टोबर दरम्यान कुटुंबासोबत फुकेटला सुट्टी घालवण्यासाठी अर्ज दाखल केला होता. मात्र न्यायालयाने स्पष्ट शब्दांत सांगितले की सध्या कोणतीही सूट दिली जाणार नाही. या प्रकरणाची पुढील सुनावणी 8 ऑक्टोबरला होणार आहे.

या जोडप्याचे वकील निरंजन मुंदरगी आणि केरला मेहता यांनी न्यायालयात असा दावा केला की 2021 मध्ये दाखल झालेल्या प्रकरणानंतरही शिल्पा-राज यांनी अनेकदा परदेश प्रवास केला आहे आणि प्रत्येक वेळी तपासात पूर्ण सहकार्य केले आहे. त्यामुळे त्यांना आता परदेशात जाण्यास अडवणे अन्यायकारक असल्याचे ते म्हणाले.

मात्र, सरकारी वकील मनकुंवर देशमुख यांनी त्यांचा युक्तिवाद धुडकावून लावला. त्यांनी न्यायालयाला सांगितले की, "शिल्पा शेट्टी आणि राज कुंद्रावर गंभीर आर्थिक गुन्ह्यांचे दोन खटले सुरू आहेत. 60 कोटी रुपयांपेक्षा मोठी फसवणूक प्रकरणात त्यांची चौकशी सुरू आहे. अशा परिस्थितीत त्यांना परदेशात जाऊ देणे धोकादायक ठरू शकते."

या खटल्यामुळे शिल्पा-राज यांच्या पुढील योजनांनाही धक्का बसला आहे. याचिकेत त्यांनी नमूद केले होते की ते ऑक्टोबरमध्ये लॉस एंजेलिस, कोलंबो, मालदीवला व्यावसायिक कारणांसाठी जाणार आहेत. तसेच डिसेंबरमध्ये दुबई आणि लंडनला कुटुंबाला भेटण्यासाठी प्रवास करणार होते. पण सध्या तरी त्यांचा हा स्वप्नातील परदेश दौरा कोर्टाच्या निर्णयामुळे अडकला आहे.