RK Story : राज कपूरची दुसरी बायको होण्यासाठी तयार होती नरगिस, प्रेमासाठी थेट गृहमंत्र्यांपर्यंत पोहोचली

नरगिस आणि राज कपूर यांच्यातील जवळीक 'बरसात' या चित्रपटाच्या शूटिंगदरम्यान अधिक वाढली. नरगिसने राज कपूरच्या आर. के. स्टुडिओत आर्थिक गुंतवणूक करायला सुरुवात केली होती. नरगिसच्या मैत्रिण नीलमने सांगितले होते की, राज कपूर नेहमीच नरगिसला म्हणायचे की ते तिच्याशी लग्न करतील. पण काळ जसा पुढे सरकरत गेला, तसतसं नरगिसला जाणवायला लागलं की राज कपूर आपल्या पत्नीला कधीच घटस्फोट देणार नाहीत. राज कपूरला घटस्फोट न देता लग्न कसे करता येईल, याचा कायदेशीर मार्ग शोधण्यासाठी नरगिस तेव्हाचे गृहमंत्री मोरारजी देसाई यांच्याकडे गेल्या होत्या. लेखिका मधु जैन यांनी त्यांच्या पुस्तकात, 'फर्स्ट फॅमिली ऑफ इंडियन सिनेमा: द कपूर्स'मध्ये लिहिले आहे की,"राज कपूर यांच्यासोबत लग्न करण्याची नरगिसची इच्छा इतकी तीव्र होती की तिने थेट तेव्हाचे गृहमंत्री मोरारजी देसाई यांच्याकडे सल्ला मागितला की ती राज कपूरसोबत कायदेशीररित्या लग्न करू शकेल".

राज कपूरही नरगिसशी लग्न करू इच्छित होते. पण त्यांचे वडील पृथ्वीराज कपूर यांना हे मान्य नव्हते. अखेरीस नरगिसलाही हे लक्षात आले की राज कपूर कधीच तिच्याशी लग्न करणार नाहीत आणि त्यांनी राज कपूरच्या आयुष्यातून बाहेर पडण्याचा निर्णय घेतला. नरगिसने कोणालाही न सांगता आर. के. फिल्म्सबाहेरची 'मदर इंडिया' ही फिल्म साइन केली तेव्हा राज कपूर यांना या गोष्टीची जाणीव झाली होती.