कृष्णा आंदेकर पोलिसांना शरण, पुणे कोर्टात साळसूदपणाचा आव, युक्तिवादावेळी काय घडलं?

अभिजीत पोते, प्रतिनिधी, पुणे : पुण्यातील आयुष कोमकर खून प्रकरणात मुख्य आरोपी कृष्णा आंदेकर याला दोन दिवसांची पोलीस कोठडी सुनावली आहे. कृष्णा आंदेकर यानेच हत्येचा कट रचला असून आरोपी यश पाटील आणि अमन पठाणला त्याने पिस्तूल पुरविले, असा दावा पोलिसांनी न्यायालयात केला. आरोपींना दिलेले हत्यार कुठून आणले आणि कृष्णाने कोणत्या ठिकाणी आरोपींकडे हत्यार सोपवले याची चौकशी करायची असल्याचा युक्तिवाद तपास अधिकाऱ्यांनी न्यायालयात केला. आरोपीचे वकील आणि पोलिसांचा युक्तिवाद ऐकल्यानंतर न्यायालयाने कृष्णा आंदेकर याला दोन दिवसांची पोलीस कोठडी सुनावली. कृष्णाला १८ सप्टेंबरपर्यंत पोलीस कोठडी सुनावल्याने आयुषच्या खून प्रकरणात कृष्णाचा नेमका सहभाग काय होता, याची चौकशी पुणे पोलीस करतील.