Raj Thackeray : राज ठाकरेंसह विरोधकांचे एक घाव, दोन तुकडे! निवडणूक आयुक्तांसोबत उद्या पुन्हा बैठक, आज मंत्रालयात काय झालं?

Published by:Shrikant Bhosale

Last Updated:October 14, 2025 2:21 PM IST

Raj Thackeray and Oppostion Meet Election Commission : ठाकरे बंधूंसह विरोधी पक्षांच्या नेत्यांनी प्रश्नांच्या फैऱ्या झाडल्यानंतर आता उद्या पुन्हा एकदा निवडणूक आयुक्तांसोबत बैठक होणार आहे.

राज ठाकरेंचे एक घाव, दोन तुकडे! निवडणूक आयुक्तांसोबत उद्या पुन्हा बैठक, आज मंत्रालयात काय झालं?

मुंबई: निवडणूक मतदार यादीतील त्रुटींसह इतर काही प्रक्रियांवर आक्षेप घेत महाविकास आघाडीचे शिष्टमंडळ निवडणूक आयुक्तांच्या भेटीसाठी दाखल झाले. शरद पवार, उद्धव ठाकरे, डॉ. अजित नवले, जयंत पाटील आदींच्या शिष्टमंडळाने मुख्य निवडणूक अधिकाऱ्यांची भेट घेतली. पण, या बैठकीत ठाकरे बंधू आक्रमक झाल्याचे दिसून आले. ठाकरे बंधूंसह विरोधी पक्षांच्या नेत्यांनी प्रश्नांच्या फैऱ्या झाडल्यानंतर आता उद्या पुन्हा एकदा निवडणूक आयुक्तांसोबत बैठक होणार आहे.

मतदारयादीसह प्रभाग रचना आणि इतर मुद्यांवरून आज महाविकास आघाडीच्या नेत्यांनी मुख्य निवडणूक अधिकारी एस. चोक्कलिंगम आणि मुख्य निवडणूक आयुक्त यांची भेट मविआच्या शिष्टमंडळाने घेतली. दोन वेगवेगळ्या शिष्टमंडळांकडून मुख्य निवडणूक अधिकारी आणि मुख्य निवडणूक आयुक्तांची भेट घेतली आहे.

मनसे अध्यक्ष राज ठाकरे यांनी म्हटले की, मतदार याद्यांमध्ये प्रचंड घोळ आहे. दोन दोन ठिकाणी मतदारांचे नाव कसे असा सवाल त्यांनी केला. वडिलांचं वय मुलाच्या वयापेक्षा कमी असल्याकडे राज यांनी लक्ष वेधले. निवडणूक लागलेली नाही तरी मतदान नोंदणी बंद का केली? जे आज 18 वय पूर्ण करत आहे, त्यांनी मतदान करू नये का? असा सवालच राज यांनी केला. निवडणूक याद्यांमध्ये एवढा घोळ, तुम्ही कसं निवडणुकांना सामोरे जाता? असा सवाल त्यांनी केला.

व्हीव्हीपॅटवर विरोधक आक्रमक...

स्थानिक स्वराज्य संस्थांच्या निवडणुकीत महापालिकांच्या पॅनल निवडणुकीत व्हीव्हीपॅट लावण्यात येणार नसल्याच्या निवडणूक आयोगाच्या निर्णयावर विरोधकांनी नाराजी व्यक्त केली. या मतदानात व्हिव्हिपॅट मशीन लावण्याची मागणी राज ठाकरे यांनी केली. मतदान कोणाला जातंय हे मतदारालादेखील कळत नसल्याचे उद्धव ठाकरे यांनी म्हटले. देशात आता कुठेच निवडणुका नाहीत तर VVPAT आणा अशी आग्रही भूमिका राज ठाकरे यांनी मांडली. राज्य निवडणूक आयोगाच्या प्रमुखांना बोलवा, सविस्तर चर्चा होईल, असे राज यांनी म्हटले.

राज यांच्या मागणीनंतर मुख्य निवडणूक अधिकारी एस. चोक्कलिंगम यांनी निवडणूक आयुक्तांसोबत बैठक घेण्याची मागणी मान्य केली. त्यामुळे उद्या आता महाविकास आघाडीच्या नेत्यांसह निवडणूक आयोगाच्या अधिकाऱ्यांची बैठक पार पडणार आहे. ही बैठक मंगळवारी सकाळी 11 वाजता होणार आहे.

आव्हाडही आक्रमक

विधानसभा निवडणुकी आधी 18 रोजी नोव्हेंबर आम्ही पत्र दिले आयोगाला, खोटे मतदार नोंदणी झाल्या. त्यावर कोणतीही कारवाई झाली नाही. आज एक आमदार सांगतो की आम्ही बाहेरून मतदार आणले. अजून काय पुरावा हवाय तुम्हाला, असा सवाल शरद पवार गटाचे नेते जितेंद्र आव्हाड यांनी उपस्थित केला.

घर अस्तित्वात नाही, पण मतदार आहेत...

राष्ट्रवादी शरद पवार गटाचे नेते जयंत पाटील यांनी म्हटले की, आमच्या पक्षाकडून दिल्लीला आणि महाराष्ट्र आयोगाला पत्र दिले होते. आयोग म्हणतं की पत्रच आले नाही. आमच्याकडे पुरावे आहेत. अनेक घरं अशी आहे जी अस्तित्वात नाही, पण तिथे मतदार असल्याचे जयंत पाटील यांनी म्हटले. एखादं सॉफ्टवेअर वापरुन दुबार मतदार मतदार यादीतून बाहेर काढा, अशी मागणी देखील त्यांनी केली. राष्ट्रवादी शरद पवार गटाचे नेते जयंत पाटील यांनी म्हटले की, आमच्या पक्षाकडून दिल्लीला आणि महाराष्ट्र आयोगाला पत्र दिले होते. आयोग म्हणतं की पत्रच आले नाही. आमच्याकडे पुरावे आहेत. अनेक घरं अशी आहे जी अस्तित्वात नाही, पण तिथे मतदार असल्याचे जयंत पाटील यांनी म्हटले. एखादं सॉफ्टवेअर वापरुन दुबार मतदार मतदार यादीतून बाहेर काढा, अशी मागणी देखील त्यांनी केली.

शिष्टमंडळात कोण?

मुख्य निवडणूक अधिकारी एस. चोक्कलिंगम यांच्या भेटीसाठी ज्येष्ठ नेते शरद पवार, शिवसेना ठाकरे गटाचे पक्षप्रमुख उद्धव ठाकरे, मनसे अध्यक्ष राज ठाकरे, राष्ट्रवादी शरद पवार गटाचे नेते जयंत पाटील, काँग्रेसचे ज्येष्ठ नेते बाळासाहेब थोरात, मार्क्सवादी कम्युनिस्ट पक्षाचे कॉ. अजित नवले, ठाकरे गटाचे खासदार अनिल देसाई, आमदार अनिल परब, शेतकरी कामगार पक्षाचे नेते जयंत पाटील, राष्ट्रवादी पवार गटाचे शशिकांत शिंदे, जितेंद्र आव्हाड, समाजवादी पक्षाचे नेते रईस शेख, भाकपचे कॉ. प्रकाश रेड्डी उपस्थित आहेत.

view comments