वाई विधानसभा निवडणूक 2024: वाईच्या सुभ्यासाठी दोन राष्ट्रवादींमध्ये काटें की टक्कर! मकरंद पाटलांसमोर अरुणादेवी पिसाळांचं आव्हान

सातारा : सातारा हा काँग्रेस-राष्ट्रवादीचा पारंपरिक गड. या जिल्ह्याकडून विधानसभा निवडणुकीत महाविकास आघाडीला अपेक्षा आहेत. सातारा जिल्ह्यात विधानसभेचे आठ मतदारसंघ आहेत. सातारा, कराड उत्तर, कराड दक्षिण, वाई, पाटण, कोरेगाव, फलटण, माण हे विधानसभा मतदारसंघ आहेत. यापैकी सध्याच्या स्थितीनुसार 5 विधानसभा मतदारसंघांमध्ये महायुतीचे विद्यमान आमदार आहेत तर 3 विधानसभा महाविकास आघाडीच्या आमदारांकडे आहेत. वाई हा राष्ट्रवादी काँग्रेसचा बालेकिल्ला राहिला आहे. त्यामुळे अजित पवार विरुद्ध शरद पवार यांच्या गटांमध्ये या मतदारसंघात थेट लढत होणार आहे. मकरंद पाटील हे वाईचे विद्यमान आमदार आहेत. ते अजित पवार यांचे समर्थक आहेत. युतीच्या जागावाटप सूत्रानुसार ही जागा राष्ट्रवादीकडेच आली आणि अजित पवारांनी विद्यमान आमदार मकरंद पाटील यांनाच तिकिट दिलं आहे.