Devendra Fadnavis: 'जिथे शक्य तिथे महायुती आणि...' स्थानिक निवडणुकीबद्दल मुख्यमंत्री फडणवीस यांचं मोठं विधान

नागपूरमध्ये स्थानिक स्वराज्य संस्था निवडणुकीच्या तोंडावर आढावा बैठक पार पडली. या बैठकीनंतर मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण यांनी माध्यमांशी संवाद साधला.

'आमचे अध्यक्ष रवींद्र चव्हाण यांनी संपूर्ण महाराष्ट्राचा दौरा विभागवार ठरवला होता. त्यामध्ये जिल्हा परिषद, महापालिका, नगरपालिका याचा आढावा घेण्यासाठी हा दौरा होता. मुंबई वगळून बाकी सर्व विभागाच्या नियोजनाच्या बैठका आम्ही पूर्ण केल्या आहे.. आमच्या टीमने काय नियोजन केले, त्यांनी काय प्लॅनिंग केलाय, कार्यकर्ते पदाधिकाऱ्यांना एक दिशा देणे आणि त्यांच्या तयारीबद्दल त्यांना मार्गदर्शन करणे अशा प्रकारचा हा सगळा दौरा होता. एक एका मतदारसंघाचा आढावा आम्ही या ठिकाणी घेतलेला आहे आणि एकूणच स्थानिक स्वराज्य संस्थेच्या निवडणुकीच्या निमित्ताने पक्षांमध्ये प्रचंड उत्साह आहे. साधारणपणे आम्ही सगळ्यांना सांगितले आहे की जिथे जिथे शक्य आहे तिथे महायुतीने आपल्याला लढायचं आहे, पण ते अधिकार आम्ही स्थानिक स्तरावर दिलेले आहेत' असं फडणवीसांनी स्पष्ट केलं.

तसंच,  'प्रदेशाध्यक्षांनी स्पष्टपणे सांगितलं की, स्थानिक नेतृत्व जो निर्णय करेल तोच निर्णय मान्य असेल. मात्र जिथे युती होऊ शकणार नाही, त्या ठिकाणी मित्र पक्षांवर कोणी टीका करणार नाही. काही ठिकाणी मैत्रीपूर्ण लढत असेल अशा प्रकारचा निर्णय देखील घेण्यात आलेला आहे. आणि कार्यकर्त्यांनी ते मान्य केले आहे' असंही फडणवीस यांनी सांगितलं.