Pune News : पुण्यात शेततळ्यात बुडून 4 मुलांचा मृत्यू; आईवडिलांनी वाचवण्यासाठी घेतली धाव पण..

आंबेगाव तालुक्यातील निरगुडसर येथे आज दुपारी साडेतीन वाजता शेततळ्यामध्ये बुडून चार विद्यार्थ्यांचा मृत्यू झाला आहे. ही मुले शेतमजूर कुटुंबातील आहेत. श्रद्धा काळू नवले (वय 13) सायली काळू नवले (वय 11) दीपक दत्ता (वय- 7 राहणार- कान्हेवाडी राजगुरुनगर) राधिका नितीन केदारी (वय -14 राहणार कानेवाडी राजगुरुनगर)अशी मृत मुलांची नावे आहेत. श्रद्धा आणि सायलीही दोन्ही मुले गोरक्षनाथ बबन कवठे (राहणार जवळे बाळेश्वर संगमनेर जिल्हा नगर) यांनी दत्तक घेतली होती.

कवठे हे शेतमजुरीचे काम करत आहेत. ही दोन्ही भावंडे निरगुडसर येथील पंडित जवाहरलाल नेहरू विद्यालय शिक्षण घेत होते. शाळेला सुट्टी असल्यामुळे ही चारही मुले शेततळ्याजवळ खेळत होती. ही मुले बुडत असल्याची माहिती मिळाल्यानंतर कवठे त्यांची पत्नी ज्योती तातडीने शेततळ्याजवळ गेले. पण तोपर्यंत मुलांची प्राणज्योत मालवली होती. देवेंद्र शेठ शहा फाउंडेशन रुग्णवाहिका चालक स्वप्निल मोरे यांनी भीमाशंकर कारखान्याच्या कर्मचाऱ्यांच्या मदतीने चारही मुलांना मंचर उपजिल्हा रुग्णालयात शवविच्छेदनासाठी दाखल करण्यात आले आहे.