'हो... मी डेट करतेय', 'आई कुठे काय करते' फेम 'संजना'ला मिळाला पार्टनर, सर्वांसमोरच जाहीर केलं प्रेम, म्हणाली...

मुंबई: छोट्या पडद्यावरील लोकप्रिय अभिनेत्री रुपाली भोसले सध्या तिच्या कामामुळे खूप चर्चेत आहे. ‘आई कुठे काय करते’ या मालिकेत ‘संजना’ची भूमिका साकारून तिने प्रेक्षकांची मनं जिंकली.

आता तिने एका मुलाखतीत तिच्या वैयक्तिक आयुष्याबद्दल काही असे खुलासे केले आहेत, जे ऐकून तिचे चाहतेही थक्क झाले आहेत.

‘राजश्री मराठी’ला दिलेल्या मुलाखतीत जेव्हा रुपालीला तिच्या रिलेशनशिप स्टेटसबद्दल विचारण्यात आलं, तेव्हा तिने कोणताही आडपडदा न ठेवता उत्तर दिलं. ती म्हणाली, “हो… मी डेट करत आहे… मी रिलेशनशिपमध्ये आहे.”

त्यानंतर तिला ‘तू लग्न कधी आणि कोणाशी करणार?’ असं विचारल्यावर तिने दिलेलं उत्तर खूपच मजेशीर आणि हटके होतं.

ती म्हणाली, “माझं लग्न झालंय. मी स्वतःशीच लग्न केलंय.” तिच्या या उत्तराने सगळ्यांनाच हसू आलं. पण त्यानंतर तिने लग्नाबद्दल तिची खरी भूमिका स्पष्ट केली.

रुपाली म्हणाली, “मला माझ्या आयुष्यात नक्कीच पुढे जायचं आहे, पण जोपर्यंत माझ्या भावाचं सगळं मार्गी लागत नाही, तोपर्यंत मी लग्नाचा विचार करू शकत नाही.”

रुपालीने सांगितलं की, सध्या ती तिच्या आई-वडिलांना आणि भावाला सांभाळत आहे. जोपर्यंत तिचा भाऊ लग्न करून सेटल होत नाही, तोपर्यंत ती स्वतःच्या लग्नाचा विचार करणार नाही.

ती म्हणते, “तोपर्यंत माझ्या डोक्यात सतत त्याचेच विचार येत राहतील. मग मी जिथे असेन, तिथे ना ती माणसं आनंदी राहणार ना मी.”

रुपाली पुढे म्हणाली की, “जो कोणी माझ्या आयुष्यात येईल, त्याला माझं कुटुंब त्याचीही जबाबदारी वाटली पाहिजे. आई-वडील आहेत तोपर्यंत त्यांची जबाबदारी माझी आहे. उद्या संकेत म्हणाला की, आम्ही वेगळे राहतोय, तरी मला काहीच प्रॉब्लेम नसेल. तो सुखी राहणं महत्त्वाचं आहे.”

‘आई कुठे काय करते’ मालिकेनंतर रुपाली त्याच वाहिनीवरच्या ‘लपंडाव’ या मालिकेतून पुन्हा एकदा प्रेक्षकांच्या भेटीला येणार आहे. या मालिकेत ती ‘सरकार’ची भूमिका साकारणार आहे.