डायट उत्तम, नियमित व्यायाम, तरी अचानक का वाढतं वजन? डायटिशियनने सांगितलं कारण

रांची : आजकाल अनेकजण वजन कमी करण्यासाठी प्रयत्नात असतात. क्रीडा क्षेत्राशी संबंधित व्यक्तींचं वजन तसं नियंत्रणात असतं. मात्र कुस्तीपटू विनेश फोगाट हिच्या रातोरात वाढलेल्या 100 ग्रॅम वजनानं संपूर्ण जगाला विचारात पाडलं. एका दिवसात 3 कुस्तीपटूंना चितपट करून फायनलला पोहोचलेली विनेश फक्त या 100 ग्रॅम वजनामुळे ऑलिम्पिकमधून थेट डिसक्वालिफाय झाली. वजन नेमकं असं अचानक का वाढतं? याबाबत डॉक्टर काय सांगतात जाणून घेऊया.

झारखंडची राजधानी असलेल्या रांचीमधील सुप्रसिद्ध डायटिशियन डॉक्टर प्रभास कुमार यांनी सांगितलं की, कधीकधी असं होतं, आपण नियमितपणे व्यायाम करतो, मात्र ऐनवेळी कुठे जायचं असेल, काही कार्यक्रम असेल नेमकं तेव्हाच आपलं वजन वाढतं. मग आपल्यालाच कळत नाही, असं का होतंय. आपण व्यायाम तर उत्तम करतोय, डायटही फॉलो होतंय, मग चुकतंय कुठे?...याचं उत्तर जाणून घेऊया.

स्ट्रेस हे वजन वाढण्यामागच्या महत्त्वाच्या कारणांपैकी एक कारण. ज्यामुळे शरिरातले हॉर्मोन्स असंतुलित होतात. तर, दुसरं कारण म्हणजे शरिरात वॉटर रिटेंशन होणं. जसं खूप गोड खाणं आरोग्यासाठी घातक असतं, तसं खूप खारट पदार्थही खाऊ नये. जास्त मीठ खाल्ल्यास वॉटर रिटेंशन होतं. म्हणजे शरिरात पाणी व्यवस्थित डिटॉक्स होत नाही. ज्यामुळे वजन वाढू शकतं.