पावसात फिरायला जायचा प्लॅन करताय? मुंबईजवळच्या 'या' पर्यटनस्थळी मनाई!

ठाणे : पावसाळा सुरू होऊन अजून एक महिनाही झाला नाही, तर पावसाळी पर्यटनाबाबत दुर्घटना समोर आल्या. पुण्याच्या भुशी डॅम परिसरात धबधब्यात एकाच कुटुंबातील 5 जण वाहून गेले, या घटनेनं संपूर्ण महाराष्ट्राला सुन्न केलं. त्यानंतर आता विविध ठिकाणी पर्यटकांसाठी सतर्कतेचा इशारा जारी करण्यात आलाय, तर धोकादायक पर्यटनस्थळं बंदच ठेवण्यात आली आहे. आता ठाणे प्रशासनानंही याबाबत महत्त्वपूर्ण निर्णय घेतला आहे.

ठाणे जिल्ह्यातील सर्व पर्यटन स्थळांवर जिल्हा प्रशासनानं मनाईचा आदेश लागू केला आहे. पावसाळ्यात अल्हाददायक असं गार वातावरण असतं, निसर्गानं जणू हिरवी शाल पांघरल्याप्रमाणे सगळीकडे हिरवळ पाहायला मिळते. याच निसर्गरम्य वातावरणाचा अनुभव घेण्यासाठी अनेकजण मोठ्या प्रमाणावर पावसाळी पर्यटन करतात. परंतु या दिवसांत वाटा निसरड्या झालेल्या असतात, पाण्याचा प्रवाह वाढलेला असतो, झाडाझुडूपांमध्ये विषारी प्राण्यांचा सुळसुळाट असतो. त्यामुळे दुर्घटना घडण्याची शक्यता प्रचंड असते. म्हणूनच पर्यटकांनीही आपापली काळजी घ्यायला हवी.