फाटलेल्या ओठांवर, ओठांच्या काळपटपणावर जबरदस्त उपाय, वापरा देशी लिप बाम!

आयुर्वेदाच्या जाणकार किरण पांडे यांनी सांगितलं की, देशी तुपात अनेक पोषक तत्त्व असतात. हे नैसर्गिक मॉइस्चरायजर म्हणून आपण वापरू शकता. तुपामुळे ओठ अनेक तास हायड्रेटेड राहू शकतात, तसंच मऊ, चमकदार होतात. ओठांवरचा काळसरपणा निघून जातो. ओठ फाटत नाहीत आणि गुलाबी राहतात. एकूणच, तूप हे ओठांच्या सर्व समस्यांवर आरामदायी असतं.

तुपात फॅटी अ‍ॅसिड असतं ज्यामुळेच ओठांचा काळपटपणा दूर होऊ शकतो. दररोज तूप वापरल्यास कालांतरानं ओठ नैसर्गिक गुलाबी दिसू लागतात. तूप त्वचेच्या आत मुरून त्वचेला मऊ करतं. जर ओठांवर जळजळ होत असेल, तर तूप आवर्जून लावावं. त्यामुळे ताबडतोब आराम मिळू शकतो.

चमचाभर देशी तुपात चिमूटभर हळद मिसळावी. हे मिश्रण लावून ओठांना हलक्या हातानं मसाज करावी. मग रात्रभर तूप ओठांवर तसंच राहू द्यावं. सकाळी कोमट पाण्यानं ओठ स्वच्छ धुवून घ्यावे. जेव्हा जेव्हा ओठ सुकतील तेव्हा तेव्हा थोडं तूप लिप बामसारखं ओठांना लावू शकता. यामुळे ओठ फाटणार नाहीत.

हिवाळ्यात संपूर्ण त्वचा कोरडी होते, ओठांचाही रंग उडतो. थंडीच्या दिवसांमध्ये ओठ छान मऊसर, गुलाबी ठेवण्यासाठी बाजारात विविध उत्पादनं उपलब्ध असतात, मात्र त्यातल्या केमिकल्समुळे त्वचेचे, ओठांचे हाल होऊ शकतात. त्यामुळे घरच्या घरी त्वचेची व्यवस्थित काळजी घेणं कधीही उत्तम.

देशी तूप त्वचेसाठी सर्वोत्तम मानलं जातं. यातून त्वचेला नैसर्गिक पोषण मिळतं. रात्री झोपताना तूप लावणं फायदेशीर ठरतं. हळद, साखर आणि गुलाब पाण्याच्या मिश्रणात तूप मिसळूनही आपण वापरू शकता. देशी तुपामुळे आपण ओठांचा कोरडेपणा, काळपटपणा सहज घालवू शकता.