Mahashivratri 2025: भोलेनाथाचा रुद्रावतार सोसावा लागेल! महाशिवरात्रीच्या पूजेत बिलकूल करू नये या चुका

शिवलिंगावर कुंकू अर्पण करू नये - शंकराच्या पूजेच्या वेळी शिवलिंगावर बेलपत्र, भांग, धतुरा, फळझाड इत्यादी साहित्य अर्पण केले जाते. पण कुंकू कधीच अर्पण केले जात नाही. हिंदू धर्मात स्त्रिया आपल्या पतीच्या दीर्घायुष्यासाठी कुंकू लावतात, पण भगवान शिवाचे एक रूप विनाशक असल्याचे मानले जाते. त्यांच्या विनाशकारी स्वभावामुळे शिवलिंगावर कुंकू अर्पण करणे निषिद्ध मानले जाते.

शिवलिंगावर हळद अर्पण करू नये - हिंदू धर्मात हळद अत्यंत शुद्ध आणि पवित्र मानली जात असली तरी तिचा उपयोग शिवपूजेत केला जात नाही. शास्त्रानुसार शिवलिंग हे पुरुष तत्त्वाचे प्रतीक असून हळदीचा संबंध स्त्रियांशी आहे. यामुळेच भोलेनाथाला हळद अर्पण केली जात नाही. केवळ महाशिवरात्रीलाच नाही, तर इतर कोणत्याही प्रसंगी शंकराला किंवा शिवलिंगाला हळद वाहण्याची चूक करू नये.

शिवलिंगावर तुळस अर्पण करू नये - तुळशीचा जन्म मागील जन्मी राक्षस कुळात झाला होता. तिचे नाव वृंदा होते, ती श्री हरी विष्णूची परम भक्त होती. वृंदाचा विवाह राक्षस राजा जालंधरशी झाला होता. पत्नीच्या भक्तीमुळे आणि विष्णूकवचामुळे जालंधरला अमरत्वाचे वरदान लाभले. एकदा जालंधर देवतांशी लढत असताना वृंदा पूजेला बसली आणि पतीच्या विजयासाठी विधी करू लागली. भक्तीच्या प्रभावामुळे जालंधर हरत नव्हता. तेव्हा भगवान शिवाने त्याचा वध केला. वृंदाला आपल्या पतीच्या निधनाने खूप दुःख झाले आणि तिने रागाने महादेवाला शाप दिला की, तुळशीची पाने आपल्या पूजेत कधीही वापरली जाणार नाहीत.

शिवलिंगाला शंखाने जल अर्पण करू नये - शिवलिंगावर कधीही शंख घेऊन जल अर्पण करू नये. प्रत्येक देवतेच्या पूजेत शंख वापरला जातो. पण महादेवाच्या पूजेत कधीच वापरला जात नाही. शिवपुराणानुसार, शंखचूड एक पराक्रमी राक्षस होता, ज्याचा वध स्वतः भगवान शिवाने केला होता. म्हणूनच महाशिवरात्रीला शिवलिंगाला कधीही शंखातून जल अर्पण केले जात नाही, आपणही ती चूक करू नये.

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)